PÁXINA DE MERÉ
Bienveníos a la páxina
del pueblín. Pa los que sois d’ellí, munches de les coses
qu’apaecen nella yá les conocéis, pero va sirvir d’alcordanza,
sobre manera pa tolos que tán lloñe y tienen señaldá
pol contactu colos sos oríxenes.
Pa los visitantes que nun lu conozan, tengo enfotu en que seya un mou de dalu
a conocer un poco y que s’animen a visitanos.
Espero que perdonéis los seguros errores o fallos que va haber nesta
páxina.
Espero dir solucionándolos pasín ente pasu cola vuestra ayuda.
Podéis collaborar na actualización d’esta páxina
mandándome tou tipu de noticies, comentarios, suxerencies, semeyes, etc.
a la mio dirección de corréu tragamillas@marca.es , o calcando
nel gif d’abaxo col mio nome.
Un saludu pa toos.
HISTORIA.
La parroquia de Meré tien bien poca historia. La so práctica incomunicación col restu del mundu hasta finales del sieglu XIX, convierte prácticamente la so historia en prehistoria.
Vida primitiva d’esclavos más que d’homes llibres, al serviciu d’unos pocos señores que poseíen la cásique totalidá de la tierra y del ganáu, contrataos en réxime d’arrendamientu y de "comuña", el más abusivu de tolos los contratos llegales; y controlaben asina al pueblu políticamente, como si falare "el Dios del cielu", según la gráfica espresión popular.
La primer anuncia histórica que s’atopa ye del añu 1568, cuando los vecinos de Meré tuvieron un pleitu cola Malatería de Santa María Madalena d’Ardisana "pola posesión de la tierra".
Nun blincu
de dos sieglos y mediu llegamos dempués a febreru del añu 1810,
na Guerra de la Independencia, cuando un grupu de guerrilleros, dirixíos
pol teniente Noriega y l’alférez don José Balmori, sorprendieren,
nel desfiladeru del Ríu Las Cabras, a un convoi francés unviáu
dende Llanes por Aubrill pa soxulgalos, recibiérenlu con piedres enormes
y disparos de fusil, y llograren facese col desfiladeru faciendo tornar al enemigu
pa la parroquia d’Ardisana. Nun me paez que puea achacáse-y a la
imaxinación el suponer que d’ente aquellos guerrilleros s’alcontraría
un bon númberu de merenchos, como los meyores conocedores que yeren del
terrén pa orientar a los xefes y conducilos a les cumales del Tornu y
de Las Canales, nes
que taríen allugaos na batalla. Por dalgo escribía’l xeneral
Bonnet que "nun hai un vecín nin siquier que tea na so casa: anden
pel monte y armaos".
Pasamos lluéu a 1860, onde según Ángel Pola nel so llibru "Papeles Viejos", un llobu mordió a 15 persones en Meré, y por cuenta d’ello’l Gobiernu de so Maxestá tuvo que soltar 7.000 mrvs. y 1200 l’Ayuntamientu, y amás el Gobiernu remitió con oficiu del 11 de mayu d’esi mesmu añu, dos caxes de polvos del pastor Alfonso que debíen ser dalgo asemeyao a los consabíos de la madre Celestina.
Cola apertura
de la carretera qu’axunta Posada de Llanes con Onís y Cabrales
l’añu 1885, y que traviesa la parroquia de punta a punta, medró
la so actividá económica, coincidiendo tamién peles mesmes
feches cola fundación de la parroquia, en 1891. Hasta entós los
tres pueblos de Meré formaben parte de la vecina parroquia d’Ardisana.
Recuerden los vieyos como una cosa sensacional na vida de la parroquia l’eclipse
total de sol que tuvo llugar el trenta d’agostu de 1905, a les tres y
media la tarde, colos consiguientes y lóxicos episodios de pánicu
ente la xente.
El momentu históricu de más importancia na vida de la parroquia foi ensin dulda la última Guerra Civil, na que tuvo asitiáu en Meré per dalgún tiempu un Cuartel Xeneral del mandu republicanu, lo que tuvo como consecuencia un gran movimientu de tropes, y los lóxicos bombardeos per parte de les fuerces nacionales sobre’l pueblu y la so redolada, en particular sobre la Vega Íbeu, pasu obligáu del exércitu republicanu en retirada, y la quema de les meyores cases del pueblu per parte de les fuercies republicanes na so fuxida la nueche primero de la so salida. Na Vega d’Íbeu puen vese entá furacones fechos poles bombes, y pasiando per aquellos montes nun ye raro alcontrar casquiellos d’ametralladora o fusil.
Otros momentos históricos pa la parroquia fueron -dempués de l’apertura de la carretera- los de la instalación de la lluminaria llétrico, nel añu 1924, y les del agua y la comunicación telefónica, en 1968 y1969 respectivamente.
VIDA ECONÓMICA.-
La miseria dominaba de vieyo na parróquia, tanto polos rudimentarios
métodos de trabayu, como, sobre manera, por tar la propiedá en
manes d’unos pocos señores.
El trabayar ruinucos pedazos de tierra, espardíos pel monte, en réxime
d’arrendamientu, y con ganáu en "comuña", ensin
nada propio, yera l’estremu de la miseria. Yera dexase morrer, sobre too
en casu d’enfermedá. Por ello la mortalidá yera desaxerao.
La única solución pa ser a sobrevivir yera la emigración
temporal de tolos homes, dende los cinco o seis años, nos meses de branu,
de primeros de mayu hasta payares, a la busca del trabayu de les xeres, dientro
y fuera de la provincia, pa poder ganar quince duros pola temporada al entamu
del sieglu pasáu, y asina pagar les deudes contrayíes pel iviernu
nes tiendes del pueblu o colos usureros de turnu. El trabayu nes teyeres suponía
tremendos sufrimientos y privaciones.
Más tarde cola pequeña revalorización de la lleche y del
ganáu y cola emigración sobre too, camudó non poco la fisonomía
económica de la parroquia, desterrando la miseria pero non la probitú
de munchos. La mayoría yeren yá propietarios de les tierres, y
toos del ganáu suyo.
N’actualidá, la economía nun ye solo ganadera, yá
qu’esisten na parroquia un par d’empreses dedicaes a la construcción
o a la producción de materiales pa la mesma, y otra dedicada a la producción
d’áridos colos que ta construyéndose l’Autovía
del Cantábricu al so pasu pel conceyu.
También esisten, rellacionaos col turismu, dellos negocios d’hostelería
y agospiamientu rural.
LA GANADERÍA.-
Hasta hai bien pocos años, la principal riqueza de la parroquia yera
la ganadería. Los vecinos de Meré, El Cuetu y El Ceu yeren casi
toos ganaderos. Había recielles grandes d’oveyes y dalgunes de
cabres, y pocos yeren los vecinos que nun teníen la so reciella, pequeña
o grande. Anguaño desapaecieren casi dafechu, y nun queden más
que dos o tres recielles d’oveyes.
Nunes cuantes décades dedicáronse a la cría de ganáu
vacuno selecto, sobre manera de producción llechera, dexando a un llau’l
ganáu vacuno del país, de baxa producción llechera y de
pocu rendimientu de carne.
Sacábase bon beneficiu de la lleche, como tamién de la cría
de xatos y de les transaciones col ganáu mayor pal que miraben por ameyorar
d’añu en añu pa sacar d’ello la mayor ventaya posible.
El ganáu yera, entós, casi esclusivamente, la única fonte
d’ingresos monetarios, porque nel cultivu de la tierra , polo xeneral,
semábase pa la familia. Dalgunos, sicasí, sacaben daqué
tamién de la venta de patates y fabes, asina como de la fruta: mazanes,
cereces, castañes y nueces preferentemente, que ye lo que más
abondaba na parroquia.
Anguaño, el ganáu de lleche desapaeció casi dafechu y nun
queden más que tres o cuatro vecinos que se dediquen a ello. En cambiu,
resurdió otra vuelta’l ganáu pa la producción de
carne de races autóctones por cuenta del aumentu del preciu d’ello
y les ayudes pa esta mena de ganadería. De toles maneres, son pocos los
vecinos que se dediquen a la ganadería, por cuenta del avieyamientu de
la población y del despoblamientu de la parroquia, yá que la mayoría
de los mozos marchen a la busca d’otros trabayos, y al poco rendimientu
económicu que s’obtién en comparanza col gran trabayu qu’ello
supón.
AGRICULTURA.-
Rellacionada cola importancia del ganáu pa la economía de la parroquia
taba la esplotación de los praos, que yera la so principal riqueza agrícola.
Tamién, y col mesmu fin, cultivabénse intensamente’l forraxe,
sobre manera’l "vallicu", que proporcionaba comida fresco tol
añu, col consiguiente beneficiu pa la producción llechera.
Cultivábense asina mesmo les patates, les fabes y el maíz. Toles
tierres de la "ería" cultivábense y siempre había
vecinos faciendo dalgún llabor nelles.
Había gran bayura d’árboles frutales, sobre too pumares,
(de los que se sacaben frutos pa facer sidra nos munchos llagares qu’había),
y cerezales como frutos carnosos, y castañales, nozales y ablanes, como
frutos secos.
Anguaño, son munchos los praos que nun s’esploten y que por cuenta
d’ello tán enllenándose de rozu, sobre manera los de los
praos altos, los de difícil accesu y los de grandor pequeñu. Na
"ería" yá nun se cultiven toles tierres y ye raro ver
a dalguién trabayando nella.
Los frutales van perdiéndose, porque nun se planten nuevos y los vieyos
van acabando, quitante les pumares, que por cuenta de la demanda de mazana pa
la producción de sidra a nivel industrial, van reponiéndose los
vieyos yá incluso plantando nuevos.
LA MADERA.-
La gran bayura forestal d’otros tiempos en nozales, carbayos y castañales
desapaeció, en gran parte por mor de lo muncho que se cortó nos
años de la preguerra y la posguerra, ensin que hubiere naide que s’interesare
por repoblar los enormes montes, y tamién poles enfermedaes, sobre manera
nes castañales.
INDUSTRIA.-
Al entamu de la década de los cincuenta hubo n’esplotación
una mina de cobre n’El Ceu, que s’abandonó al pocu tiempu
por dificultaes estraeconómiques.
Tamién esistíen cuatro molinos d’agua a lo llargo del ríu
Las Cabras, que se dedicaben a la multuración de la fariña de
maíz, de los que solo ta en funcionamientu’l de la Güera.
Anguaño hai n’esplotación una cantera de piedra en saliendo
del pueblu que aprovecha piedra que estrái en H.abariegu y tamién
piedra trayío d’otros llugares d’España, pa la construcción.
Tamién esiste una cantera d’áridos en Cosagra, a dos kilómetros
de Meré, d’onde s’abastez, ente otres obres, a la construcción
de l’Autovía del Cantábricu.
Por últimu, esiste una tercer industria dedicada a trabayar el mármole,
dientro del mesmu pueblu, n’El Valle.
ARTESANÍA:-Yeren
dellos los vecinos dedicaos a una artesanía práctica, que fabricaben
“paxos” (cestones feches con vares d’ablanal), praderes (rastriellos
de madera) y otros preseos caseros como colleres, collares, corvos, etc.
Tamién un vecín trabayaba na fabricación de piedres de
molín y piedres d’afilar guadañes, y na reparación
de molinos.
N’actualidá ye escasu esti tipu d’actividá.
RELIXOSIDÁ.-
Preba de la so vieya relixosidá son los cinco metros de cultu qu’esistíen
nuna parroquia tan pequeñina: la ilesia a Santa Euxenia, y les ermites
a San Sebastián y a San Miguel, en dellos barrios de Meré. Tamién
taben les capilles de San Fernando n’El Ceu y la de Santa Isabel n’El
Cuetu. Toes elles desapareieron güei esceuto la que ye dende’l sieglu
XIX la ilesia parroquial.
DELLES COSTUMES
LA XUNTA: Cuando yera necesario, y los domingos dempués de Misa, si nun había otra xera urxente, tocábase a “conceyu” con una campana que yera parte d’una bomba -distinta a les de les ilesies- y que taba allugada ente dos postes nun requexu del pueblu dende qu’ún de los sos párrocos prohibió emplegala pa ello como represalia pa los que nun diben a misa y taben dempués na xunta. Aconceyábense tolos vecinos sola solombra d’una tilarona -La Tilar- arguyu del pueblu, que ta na plaza principal, xunto a la ilesia, y dende ellí trataben los asuntos del bien común y comunicábense les órdenes del Alcalde Presidente del Ayuntamientu de Llanes.
CAMINOS: Un
día a la selmana (delles vegaes los xueves del iviernu, delles los sábados)
a primeres hores de la mañana, tocábase la campana del pueblu
y aconceyábense los vecinos pa dir a iguar xuntos los caminos de la parroquia.
Dicíase-yos a caún una xera, o “prestación”,
según la so edá y los medios de trabayu que teníen, como
la pareya de gües o vaques, pa ayudar nel acarretu de los preseos. Tenía
que dir ún de casa en casa, menos los vieyos y les muyeres. El que nun
podía dir tenía que pagar una multina en metálicu o facer
otru día’l doble de trabayu.
LA MATANZA: La matanza’l gochu yera una folixa pa la familia y les amistaes. Los homes qu’interveníen pa echa-y un gabitu al matachín a matar y escuartizar, y les muyeres que se xuníen al ama casa, xuntábense en comiendo o en cenando per tolo alto, y duraba la folixa hasta bien tarde. La comida principal nómase “sopa” porque’l so platu fuerte faise col fígadu del gochu y sopes de pan.
Ye asina:
“H.azse a primeros de diciembre.
De siempre cada vecín mata’l so cochu cola ayuda de los vecinos
y allegaos. Pa matalu necesítense unos cuantos homes pa tener polas patas
y pol rabu, tamién vien el matador o matachín, y una muyer pa
recoyer la sangre.
Lo primero préndese’l cochu con un ganchu de h.ierru pela papada.
Túmbanlu nel bancu y allí’l matador lu cora. La muyer tien
pola batea onde recueye la sangre y regüélvelu pa que nun s’apanale.
Dempués de muertu chamúscase con h.elechu, rozu, ocalitu o paya
y con unos h.orcadinos se corre’l quemu. Llueu llávase con agua
h.irviendo y ráspase con cuchillos y con teyones. Cuando ta yá
llimpiu ábrese pa sacar el vientre y llueu desentrellízase, qu’é
separar la grasa de las tripas; entós cuélgase d’una viga.
De la mantellina sepárase un cachu pa h.acer la morciella; l’otri
cachu de la mantellina échase a la sopa de h.ígadu pa que te más
suavina. El vientre llévase al ríu pa llavalu y h.acer llueu los
chorizos que se-y meten nel vientre. Cola parte más gorda se h.acen las
morciellas que llevan grasa, sangre, entrelliz, sal y cebolla, too ello nun
duernu o meh.or nuna duerna de madera.
Entós é cuando se h.az la sopa de h.ígadu, qu’é
pan, h.ígadu del cochu, pimentón picante y pimientu; pa acompangalu
borona de llar. Como postre, quesu podre. Al día siguiente escuártase’l
cochu; escuéyese la grasa de la carne. La grasa pícase en cachos
y ponse a desh.acer con calor pa que sale l’untu, a esti se-y echan mazanas
pardas. La carne pícase pa los chorizos, adóbase con ayu, sal
y pimientu, y déxase en adobu un día. Al día siguiente,
embútanse los chorizos. Estos se cuelgan y s’ah.umen pa que sequen.
Dempués d’escuartáu’l cochu, quedan los xamones, los
brazuelos, las tablas, la papada, los piques. Too esto métese a salar
nun duernu. El llombu adóbase y cuélgase a secar.
De lo que queda de la untaza, dempués d’estruyala pa sacar l’untu,
nómanse turruyos”.
LA ESCAPULLA: Otro tanto se pue dicir, empero más pequeñino, de los alderiques cellebraos al entamu l’iviernu pa escapullar ye dicir, pa quitar les fueyes que cubren la panoya del maíz (xera propia de les muyeres), y enrestrar, ye dicir, preparar les riestres y colgales (xera propia de los homes). Llueu ofrézse la garulla, verdaderes comides, que duren, como nes matances, hasta bien de nueche.
Ye asina:
“Si’l
maíz una vez coyíu permanez munchu tiempu nuna pila, cuez colo
que suda y púdrese. Necesita escapullase pronto. Poro precísase
la collaboración de dellos vecinos pa facer la escapulla. Al atardecer,
aconséyanse na casa vecinos y amigos (sobre too los mozos), con una invitación
que-yos dieran enantes.
Las muyeres van abriendo la “purreta de las panoyas”. Dempués
cuelgan éstas nos horros o corredores.
Durante la xera, cántase y cuéntanse historias y cosadiellas.
Cuando aparez una panoya collorada, dizse que “yá salio’l
rei” y la moza que la alcontró tien de besar a caún de los
mozos. Pa evitalo munchas veces escuéndese.
A veces sal una panoya con varios tucos. Ye nomada “la mano del semador”.
En finando’l trabayu (que pue durar varias nueches), faise la garulla,
regalu de sidra, aguardiente, castañas, mazanas… de los dueños
de la casa a los escapulladores.”
LOS VELORIOS: Cuando
morría daquién del pueblu, diben los vecinos a dar el pésame
y facer compaña a los familiares del difuntu día y nueche (de
día diben sobre too les muyeres, y de nueche los homes) hasta la hora
l’entierru, y rezaben el rosariu tol tiempu cuando había daquién
que supiere dirixilos. Tamién había la costume, güei yá
non, de llevar un sofitu económicu, “la oferta”, pa los gastos
del funeral y del entierru.
CON RELLACIÓN A LOS ANIMALES:
Cuando una vaca paría los vecinos más cercanos diben a cualquier
hora del día o de la nueche a ayudar al dueñu. Cuando un vecín
perdía un animal por tar malu o por accidente, facíase una colecta
pa compensa-y la perda, y si yera por accidente se-y ayudába mercándo
la so carne.
El que mataba un raposu o lu coyía col cepu, diba una a una per toles
cases del pueblu pa enseñar el so trofeu, vivu o muertu, en cada casu,
y pa que-y dieren un donativu como recompensa.
BRANU NOS PUERTOS:
Delles families llevaben el so ganáu a los Puertos de los Picos d’Europa
en llegando abril o mayu, según el tiempu que ficiere, y nun tornaben
hasta la primera gran nevaona, que solía ser a lo cabero de xunetu o
d’agostu pa dir a yerba.
Otros sólo llevaben les oveyes y dexábenles ehí soles,
y acudíen a veles a vegaes, sobre too, los díes de fiesta, por
si faltaba dalguna. Son persorprendentes les caminates que facíen pa
llegar allí, buscales y cuntales, y pa siguir buscando nel casu de que
faltare dalguna, y casi siempre facíase esto nun día. Entrambes
costumes fueron decayendo a dulces y güei yá nun va nadie a los
Puertos.
LA COMUÑA: Yera
un contratu que consistía no que se cita darréu: El dueñu
prestaba una vaca al comuneru dempués d’apreciala. Si se vendía
una cría, del tiempu que fuera, o se podía quedar el comuneru
cola mitá del so valor, dempués d’entrega-y la otra mitá
al dueñu, o podía dir restando del preciu en que fue valorada
la res (“el principal”) hasta entregar tol preciu del animal. Pero
lo raro del contratu ye que, dempués d’entredar tol valor de la
vaca, entovía l’amu tenía drechu a la mitá más;
y si se perdía la res, perdíase pal comuneru, y tenía que
entrega-y tol so valor al amu. Si se perdía un rebañu entero,
como pasó a dalgunos na guerra civil, el comuneru tenía que responder
de too.
AMAGÜESTU: Nesi
día ásense castañes nun tambor (cilindru metálicu
con furacos pa qu’entre la calor, con un asa pa colgalu con una “cremallera”
o cadena, y un exe col que xiralu tol ratu pa que tean bien asaes y nun se quemen
les castañes).